నాకు నచ్చిన 10 తెలుగు సినిమాలు

నిన్న ఆపరేషన్ దుర్యోధన సినిమా రివ్యూ చదివిన తరువాత….ఎలాంటి సినిమా పరిశ్రమ ఇలా
తయారయ్యిందేమిరా అని అనిపించింది. నాకు నలుపు-తెలుపు సినిమాలంటే బొత్తిగా
ఇష్టముండేది కాదు. చిన్నప్పుడు ఇంటి వద్ద చూస్తూంటే..ఎలా చూస్తార్రా ఈ సినిమాలను
అని అనుకొనే వాడిని. ఇప్పుడు నాకు నచ్చిన 10 తెలుగు సినిమాలు తీసుకొంటే..అన్నీ
నలుపు-తెలుపు సినిమాలే ఊన్నాయి :)

1) గుణసుందరి కథ

అద్భుత జానపద సినిమా యిది. దర్శకబ్రహ్మ కె.వి.రెడ్డి సృష్టించిన చిత్రరాజం. ఈ
సినిమాలో మొదట చెప్పుకోవలసింది గోవిందరాజుల సుబ్బారావు నటన. ముగ్గురు కూతుర్లకు
తండ్రిగా, ముఖస్తుతికి సంతోషపడే రాజుగా అద్భుత నటనను కనపరిచాడు.
తరువాత..శ్రీ రంజని, కస్తూరి శివరావు సరే సరి. ఈ సినిమా ప్రత్యేకత
ఏమిటంటే….ఇందులో హీరో గా నటించింది హాస్యనటుడైన కస్తూరి శివరావు. తండ్రి కన్నా
భర్తే మిన్న అని చెప్పిన పాపానికి కూతురైన గుణసుందరీ దేవికి అన్ని విధాల కురూపి,
గుడ్డి, కుంటి, చెవిటి భర్తను తీసుకొచ్చి పెళ్ళి చేస్తాడు రాజు. ఐనా తన అపారమైన
పాతివ్రత్య గుణంతో శాపగ్రస్తుడైన భర్తను మంచి రూపంలో పొందగలుగుతుంది. రాజు యొక్క
ముగ్గురు కూతుర్లను పెళ్ళాడగోరిన ముగ్గరు రాకుమారుల యెత్తులకు పైయెత్తు వేసి
కురూపి ఐన కస్తూరి శివరావు యక్షిణిని నెగ్గే దృశ్యం చూడాల్సిందే……

2) యోగి వేమన

చిత్తూరు నాగయ్య నటించి జీవించిన చిత్రం. కామవాంఛాపీడుతుడై భోగలాలసుడైన ఒక
షావుకారి..జీవితం యొక్క నిజం తెలుసుకొని సర్యం పరిత్యజించి మోక్షం పొందడమే ఈ
చిత్రం కథ. ముఖ్యంగా గుడ్డి ముసలిది పాడే “మాయను పడకే మనసా…కాయము కలిమి
పోయేవే..చేసిన పుణ్యమే చెడని పదార్థము…”, కలిమి పట్ల విరక్తి పొంది సృష్టిని
చూసి ఆశ్చర్యపోతూ వేమన పాడే “తరుహీన ..జలహీన..నిర్జీవ..నిర్వేల..మరుభూమి..” పాటలు
సినిమాకే వన్నె తెచ్చాయి

3) సత్య హరిశ్చంద్ర

సర్వకాలములందు….సత్యమే పలికే సత్యహరిశ్చంద్రుని కథ ఎవరికి నచ్చదు? దీనిలో ఒక్క
డైలాగు అలాగే గుర్తుండిపోయింది నాకు. నక్షత్రకుడు…”ఇన్ని అవస్తలు పడనేల? ఒక్క
అపద్దముతో నీ బాధలన్నీ దూరమగును కదా” అంటాడూ..దానికి హరిశ్చంద్రుడు..”నా కళ్ళ
ముందరంతా చీకటి ఉంది..దూరంగా చిన్నగా సత్యమనే వెలుగు మాత్రమే కనపడూతోంది…నేను ఆ
వెలుగు వైపుకే ప్రయాణం చేస్తున్నాను” అని జవాబిస్తాడు

4) పాండురంగ మహత్యం

ఈ వికీ వ్యాసమే కథంతా చెబుతుంది. నాకు ఇందులో “తోలు తిత్తి ఇది..తూటులు తొమ్మిది”
అనే పాట భలే నచ్చింది

5) దేవదాసు

ఈ వికీ వ్యాసమే కథంతా చెబుతుంది. ఏడుపుగొట్టు కథలంటే అసహ్యించుకొనే నన్ను ఈ సినిమా
మూడూగంటలూ కన్నార్పకుండా చూసి కథలో లీనమయ్యేలా చేసింది. బాల
మేధావి..”సి.ఆర్.సుబ్బరామన్“..అందించిన సంగీతం మరువగలమా?

6) నర్తనశాల

సినిమా చివరిలో..బృహన్నల..అర్జునుడిగా మారి..అర్జునుడు గాండీవం ఒక చేతబట్టి, మరొక
చేత్తో మహాసముద్రంలా ఉన్న లక్షల కౌరవ సైన్యం గుండెలదిరేలా దేవదత్తము పూరిస్తూ ఐదు
అశ్వములు గల రథములో వస్తూంటే…..చూడటానికి అద్భుతంగా ఉంటుంది సన్నివేశం. అది
చూడాల్సిందే కానీ మాటలో వర్ణించడానికి కుదరదు. ఈ పోస్టు కూడా చదవండి:
http://vinnakanna.blogspot.com/2007/03/blog-post_22.html

7) గులేబకావళి కథ

సినిమా పేర్లు పడేటప్పుడు…రాత్రి మర్రి చెట్టు పైన ఎముకల మనిష్యుల విన్యాసాలు
చిన్నప్పుడు భలే ఆనందాన్నిచ్చాయి.

8) జగదేకవీరుని కధ

ఈ సినిమా మా నాయన 100 సార్లు పైన చూశారంట. మా బాబాయి 66 సార్ల పైన చూశాడంట. ఆ
కాలంలో మదనపల్లె యువకులందరూ వేలంవెర్రిగా ఒక్కొక్కరు 50 సార్లు పైన చూశారంట ఈ
సినిమాను. ఇందులో “శివశంకరి…” పాట హైలైట్. చివర్లో దేవతలచే పంపబడిన 20పైన
గంధర్వులతో ఎన్.టీ.ఆర్ ఒక్క సారిగా విరుచుకుపడతాడు. ఇప్పటి సినిమాలో రౌడీలు ఒక్కరి
తరువాత ఒక్కరు హీరోవద్దకు వచ్చి ధర్మ యుద్దం చేసినట్టు కాదు……అందరితోనూ ఒకే
సారి పోరాడుతాడు. గిరి గిరా భూచక్రంలా తిరుగుతూ వాయు వేగంతో కత్తిని తిప్పుతూ
అందరినీ ఒకేసారి ఎదుర్కొనే తీరు భలే నచ్చింది.

9) గుండమ్మ కథ

ఇది కూడా ఎందుకు నచ్చిందో చెప్పాలా?…ఒక్క ముక్కలో చెప్పాలంటే..”సూర్యకాంతమ్మ“.

10) రక్త సంబంధం

ఆఖరు సీనులో ..గుడ్డివాడైపోయిన అన్న పాత్రలో ఎం.టీ.ఆర్…తన కారణంగా అన్న
తల్లడిల్లుతున్నాడన్న బాధతో సావిత్ నటన అపూర్వం. అన్న అభిమానులు తప్పక చూడవలసిన
చిత్రం.