• టాజా షరుకు

  • ఉట్టమ టపాళు

  • పాట షరుకు

  • వర్గాలు

  • Blog Stats

    • 253,689 హిట్లు

‘రెడీ’ సినిమా సమీక్ష

దాదాపు రోజూ…మా కంపెనీ క్యాంటీన్లో సాయంకాలం ఉపాహారం తిందామని వెళ్తాను. అక్కడ చూస్తే మెనూలో పానీ పూరీ, మసాలా పూరీ, సమోసా ఛాట్, కట్లెట్ ఛాట్…వగైరా వగైరా అని వ్రాసుంటాయ్. పానీ పూరీ అంటే పూరీలను నలపడు, మసాలా పూరీ ఐతే పూరీలను నలుపుతాడు, దహీపూరీ అంటే పానీపూరీలో పానీ బదులు పెరుగు పోస్తాడు, ఇక గ్రేవీలో సమోసా నలిపితే సమోసా ఛాట్, కట్లేట్ నలిపితే కట్లెట్ ఛాట్, నన్ను నలిపితే నవీన్ ఛాట్. ఇలా పై పదార్దాలు మారినా అందులో ఉన్న పూరీలూ…గ్రేవీ ఒక్కటే, తేడా యేం లేదు. ఇలా నటులు…డైరక్టర్లు మారినా మన తెలుగు సినిమా కథ ఒక్కటే అన్నట్టు తయారైంది. ఐనా తెలుగు సినిమాలు అందులోని కథలు అన్న విషయం మీద నా ఏడుపు ఇక్కడెందుకు కానీ, అసలు విషమైన ‘రెడీ’ సినిమా సమీక్షకొద్దాం. ఈ సినిమా కథ చెబితే మీకు గుడుంబా శంకర్, ఆట, ఢీ, దిల్, కృష్ణ, వినోదం, సీమ శాస్త్రి లాంటి సినిమాలు గుర్తుకు రావటం సహజం. కానీ ఖచ్చితంగా ఏ సినిమా ప్రభావం దీని మీద ఉంది అంటే చెప్పలేం, కథను పోల్చలేకుండా కుట్టాడు శ్రీనూ వైట్ల.

కథేంటంటే…

మన హీరో చందు (రామ్) ధనవంతులైన ముగ్గరు (నాజర్, తనికెళ్ల భరణి, చంద్రమోహన్) అన్నదమ్ముల ఏకైక వారసుడు. చాలా సినిమాల్లో హీరోలకున్నట్టే, ప్రేమికులకు రిజిస్టార్ ఆఫీసులో పెళ్ళి చేసే అలవాటు ఇతనికుంటుంది. ఒక సారి పెళ్ళిమండపంలో నుంచి మరదలైన తమన్నాను(హ్యాపీ డేస్ పిల్ల)తీసుకొచ్చేసి ఆమె ప్రియుడు (నవదీప్)తో రిజిస్టార్ ఆఫీసులో పెళ్ళి చేసేస్తాడు. ఈ విషయం తెలిసి ఇంట్లో పెద్దలు…బయటకు ఫో అంటారు. కుక్క తోక వంకర అన్నట్టు బుద్ది మారని మన ‘రామ్’ ఇంకో స్నేహితుడికి కూడా ఇలానే పెళ్ళి చెయ్యాలని కళ్యాణ మంటపానికి వెళ్ళి పెళ్ళికూతురును (జెనీలియా) తీసుకొచ్చేస్తాడు. తర్వాత జెనిలియా తను అనుకున్నట్లు స్నేహితుని ప్రియురాలు కాదని తెలిసి వస్తుంది. డాక్టరు ఇచ్చింది రోగి కోరింది ఒకటే అన్నట్లు మన జెన్నీకి కూడా ఈ పెళ్ళి ఇష్టం ఉండదు. అనుకోకుండా ఐనా పెళ్ళి తప్పించినందుకు రామ్‌కు జెన్నీ నెనర్లు తెలుపుతుంది. ఫోతే ఫోన్లే హమ్మయ్యా అనుకునే లోపే రాక్షసుల్లాంటి ఫ్యాక్షనిస్టులు కొందరు సుమోల్లో కత్తులు తిప్పుకొంటూ రామ్ & కో వెంట పడతారు. వీళ్ళెవరు రా మధ్యలో అంటే జెనీలియా బ్యాక్‌ గ్రౌండ్ గురించి తెలుసుకోవలసి ఉంటుంది. జెనీలియాకు 100కోట్ల ఆస్తి ఇచ్చేసి అమ్మా నాయనా చనిపోయి ఉంటారు. ఇక జెనీలియా మేనమామలు (కోటా శ్రీనివాసరావు, జయప్రకాష్‌రెడ్డి) ఇద్దరూ ఆ ఆస్తి కొట్టెయ్యటాని జెనిలియాను తమ కోడలు చేసుకోవాలని ప్రయత్నాలు చేస్తూంటారు. ఆ ఫ్యాక్షనిస్టు రౌడీల నుండి పలు మార్లు రక్షించిన రామ్‌ మీద మనసు పారేసుకుంటుంది, కానీ పెళ్ళి మాత్రం తన తన కీ.శే లైన తల్లిదండ్రుల కోరిక మేరకు మేనమామలే దగ్గరుండి జరిపించాలంటుంది. సరే అని హీరో విలన్ల ఇంటిలో బ్రహ్మానందం సాయంతో చేరి, వారిని బకరాలను చేసి వారి చేతుల మీదుగానే జెన్నీను పెళ్ళి చేసుకుంటాడు. ఇదీ కథ…

మొత్తానికేమంటానంటే…

బ్రహ్మానందం క్యామెడీ సూపరంటాను. సినిమా చూస్తే మన బ్రహ్మీకోసమే చూడాలంటాను. మెక్‌డోవెల్ మూర్తి పాత్రలో మనల్ని నవ్వుల్లో ముంచి మనల్ని నరికేస్తాడంటాను. ఏంటో ఈ సంవత్సరం హిట్టైన అన్ని సినిమాల్లోనూ బ్రహ్మానందం ప్రముఖ పాత్రపోషిస్తున్నాడు. క్యామెడీ పండించడంలో పది PHDలు తీసేసుకున్నంత పరిణితి సాధించాడనిపిస్తుంది. అసలు డైలాగులేమీ చెప్పకుండా ఎక్స్‌ప్రెషన్లతోనే అంతగా నవ్వించడమంటే సామాన్యమా!!! మొదటి సగం సినిమా ఫరవాలేదనిపించినా…రెండో సగంలో బ్రహ్మానందం వచ్చి మొత్తం థియేటర్నే నవ్వుల్లో ముంచేశాడు. చివరి ముక్కాలు గంట సినిమాను కాపాడింది. ఈ సినిమా విజయవంతం అయ్యిందంటే, అది మెక్‌డోవెల్ మూర్తి, చిట్టి రాయుడు, జూ.చిట్టి రాయుడు పాత్రలే కారణం.

ఈ సినిమాలో ఏవి నచ్చాయంటే….

  1. బ్రహ్మానందం
  2. బ్రహ్మానందం
  3. బ్రహ్మానందం
  4. బుల్లి ఫ్యాక్షనిస్టు జూ.చిట్టి రాయుడుగా మాస్టర్ భరత్ (వెంకీ సినిమాలో ట్రైన్ సన్నివేశంలో ఓ పిల్లవాడు మందు కొట్టి అల్లరి చేస్తాడే..) అద్భుత నటన. ఇంత చిన్న వయసులో క్యామెడీని ఇంత అద్భుతంగా పండించడం అరుదే.
  5. మనకున్న అద్భుత నటుల్లో జయప్రకాష్‌రెడ్డి ఒకడు. క్రౌర్యం, రౌద్రం ఎంతలా చూపగలడో, హాస్యం అంతకంటే బాగా పండించగలడు..దానికి ఈ సినిమానే సాక్షి. రాయలసీమ యాసను ఇంతకన్నా బాగా పలక గల నటుడు నేను చూడలేదు. ఆనందం సినిమాల్లో హీరో గ్యాంగును దడ దడలాడించే యస్సయ్‌గా, ఓ..చినదానాలో ఇద్దరు కూతుర్ల తండ్రిగా, దుబాయ్..శీనులో “వీడెవడ్రా మూత మందుకే, గాడ్జిల్లాలా అరుస్తున్నాడు” అనే విలన్‌గా ఇతను పండించిన హాస్యాన్ని మరువగమా?

ఈ సినిమాలో నాకు నచ్చనివి….

  1. కథ మంచి ఊపులో ఉండంగా పాటలు అనవసరంగా వస్తాయి.
  2. నేపథ్య సంగీతం బాగున్నా, పాటలలు అంతగా బాగోలేదు
  3. ఎడిటింగ్ బాగోలేదు.
  4. అనవసరమైన ఫుట్‌బాల్ గేమ్
  5. కోటా శ్రీనివాసరావు పక్కనుండి సెటైర్లేసే మనిషి (జెమిని కార్యక్రమం, టకాల్ టకాల్ ఢమాల్ డమాల్‌లో వాస్తాడే..అతను) బదులు కృష్ణ భగవాన్ ఉండుంటే…ఇంకా అద్దిరిపోయేది.

జనాలు పగలబడి నవ్విన కొన్ని సంభాషణలు/సన్నివేశాలు ఏవంటే…..

  1. వదిలెయ్యండి వాడి పాపాన వాడే పోతాడు (బ్రహ్మానందంతో ధర్మవరపు సుబ్రహ్మణ్యం) వీడి పాపానికి నేను పోయేటట్టున్నాను (బ్రహ్మానందం)
  2. ఈ ముసలోడికి పెట్టాల్సింది దండం కాదు…పిండం (మాస్టర్ భరత్)
  3. నా లాగా స్పైడర్‌మ్యాన్, సూపర్‌మ్యాన్లు మీకు ఐస్క్రీములు, బిస్కట్లు కొనిస్తార్రా….ఉన్నది ఒకటే మ్యాన్..అది చిట్టి మ్యాన్ (స్నేహితులతో మాస్టర్ భరత్)
  4. సెక్స్ మార్పిడి ఆపరేషన్ చేసుకొన్న ముమైత్‌ఖాన్లా ఉన్నావ్‌రా (సునీల్‌తో తనికెళ్ళ భరణి)
  5. యమ్మెస్.నారాయణ కుక్క పేరు పూజా అనుకొని తికమక పడే సన్నివేశం
  6. బ్రహ్మానందం కనిపించిన ప్రతి ఒక్క సన్నివేశం
  7. జూ.చిట్టి రాయుడు కనిపించిన చాలా సన్నివేశాలు..ప్రత్యేకంగా స్పైడర్‌మ్యాన్ సన్నివేశం.
  8. సునీల్ భరతనాట్యం సన్నివేశంలో తనకు తానే చెంపకు కొట్టుకొనే సన్నివేశం.

ఇంకా కొన్ని విశేషాలేవంటే….

  1. దర్శకుడు శ్రీనువైట్లకు ఇది వరుసగా మూడో విజయవంతమైన సినిమా. ఢీ, దుబాయ్ శీను తరువతా వచ్చిన సినిమా ఇది. దీంతో రామ్‌చరణ్ తేజ్‌తో సినిమా చేసే అవకాశం వచ్చిందని వినికిడి. ఇప్పటికే నాగార్జునతో ‘కింగ్’ అనే సినిమా మొదలవ్వగా, వెంకటేష్‌తోనూ సినిమా ఉందని సమాచారం.
  2. దేవిశ్రీ ప్రసాద్‌తో మూడో సారి పని చేశాడు. ఇంతకు ముందు, ఆనందం, అందరి వాడు వచ్చాయి
  3. జగడం పరాజయం తరవాత ఈ విజయం రామ్‌కు పెద్ద రిలీఫ్
  4. కథానాయకుడి సెల్‌ఫోన్ యొక్క రింగ్‌టోన్ భలే ఉంది. దావీశూక సినిమాలో అన్నగారు చెప్పిన “ఏమంటివి ఏమంటివి…” డవిలాగే…ఈ రింగ్ టోన్. ఈ రింగ్ టోన్‌కి ఈ సినిమాలో ప్రాధాన్యత ఉంది.

చివరగా…

మదనపల్లెలో సోమవారం కూడా హాలు నిండింది కాబట్టి…ఈ సినిమా హిట్టే లెఖ్ఖ. ఈ వారాంతానికి మీరి టిక్కెట్టి ఇప్పుడే బుక్ చేసుకోవచ్చును.


అన్నట్టు…నా బ్లాగులో ఇది 200వ పోస్టు,  …. దీని గురించి మరో టపా వ్రాయాలి.


ఇలాంటివే మరిన్ని సినిమా విశేషాలు:

1) ‘పరుగు’ సినిమా సమీక్ష
2) ‘జల్సా’ సినిమా సమీక్ష
3) వామ్మో… ఆపదమొక్కులవాడు
4) అనసూయ నాకు ఎందుకు నచ్చిందంటే…..

పరుగు సినిమా సమీక్ష

హల్లల్లో నవీన్..ఎలా ఉన్నావ్?
బ్రహ్మాండంగా ఉన్నాను.

వారాంతం ఏమి చేశావ్?

వారాంతంలో నేను త్….

తినడం పడుకోవడం టీవీ చూడటం తప్పించి ఇకేవన్నా చేశావా అని నా ఉద్దేశం!!

:) రెండు తెలుగు సినిమాలు చూశాను, అదీ ధియేటరుకు వెళ్ళి

ధైర్యవంతుడివే…అందులో కంత్రీ సినిమా ఉంది ..కరెక్టేనా?
శుద్ద తప్పు. రివ్యూలు చదవకుండా తెలుగు సినిమాకు వెళ్ళడమా..నోవే..

సరే నువ్వే చెప్పు ఏమేమి సినిమాలో.

శనివారమేమో పరుగు సినిమాకు వెళ్ళా, ఆదివారమేమో బొబ్రచసి సినిమాకెళ్ళాను

ఏబ్రాసి లాగా ‘బొబ్రచసి‌’ ఏమిటి … తెలుగు సినిమా పేర్లు ఇలా కూడా వస్తున్నాయా..ఈ మధ్యన?

అమాయకుడా…నువ్వు హిందీ చిత్రాలు ఫాలో కావనుకుంటా. ‘బొబ్రచసి‌’ అంటే బొమ్మానా బ్రదర్స్ చందనా సిస్టర్స్.

ఓహో అదా సంగతి. పరుగు సినిమా ఎలా ఉంది?

పర్లేసు…తల నొప్పైతే రాదు.

అసలు మీ ఊర్లో అన్ని తెలుగు సినిమాలు ఆడుతూండగా, పరుగే ఎందుకు వెళ్ళాలనుకున్నావు?

మూడు కారణాలు
1) హీరోను అనుకొని కథ అభివృద్ది చేసిన సినిమా కాదిది. కథ అనుకొని నటులను ఎంపిక చేసిన సినిమా ఇది.
2) లేచిపోయిన కూతురు గురించి తండ్రి పడే వేధన చూపాడన్నారు…సరే కథా బలం గల సినిమా కదా అనిపించింది.
3) ఇది మామూలుగా వచ్చే తెల్ల చొక్కాలు, వంద సుమోలు, ఢిష్యుం ఢిష్యుం సినిమా కాదు.

పదో తరగతిలో ఐదు మార్కుల ప్రశ్నకు సమాధానం ఇచ్చినట్టు చెప్పారు…బాగుంది. ఇక సినిమా విశేషాలేమైనా చెబుతారా?

ఆకాశంలోని నక్షత్రాలు, భారతీయ సినిమాలోని ప్రేమ కథలు ఎవ్వరూ లెక్కపెట్టలేరు. ప్రేమ , ప్రేమ అండ్ కో., ప్రేమ ఎంతమధురం, ప్రేమ కధ, ప్రేమ కానుక, ప్రేమ కిరీటం, ప్రేమ కోసం, ప్రేమ ఖైదీ, ప్రేమ చిత్రం పెళ్ళివిచిత్రం, ప్రేమ చేసిన పెళ్ళి, ప్రేమ జీవులు, ప్రేమ తపస్సు, ప్రేమ దీపాలు, ప్రేమ నక్షత్రం, ప్రేమ నాటకం, ప్రేమ పంజరం, ప్రేమ పల్లకి, ప్రేమ పిచ్చోళ్ళు, ప్రేమ ప్రయాణం, ప్రేమ బంధం, ప్రేమ మందిరం, ప్రేమ మూర్తులు, ప్రేమ యుద్ధం, ప్రేమ విజేత, ప్రేమ సంకెళ్ళు, ప్రేమ సామ్రాట్, ప్రేమ సింహాసనం, ప్రేమ-పగ, ప్రేమంటే ఇదేరా, ప్రేమకానుక, ప్రేమకు వేళాయెరా, ప్రేమతరంగాలు, ప్రేమద్రోహి, ప్రేమనగర్, ప్రేమపుస్తకం, ప్రేమలు – పెళ్ళిళ్ళు, ప్రేమలేఖలు , ప్రేమలో ప్రమాదం, ప్రేమవిజయం, ప్రేమశిఖరం, ప్రేమాభిషేకం, ప్రేమాయణం, ప్రేమించానునిన్నే, ప్రేమించి చూడు , ప్రేమించి పెళ్ళి చేసుకో, ప్రేమించిచూడు, ప్రేమించు పెళ్ళాడు, ప్రేమించుకుందాం రా, ప్రేమించేది ఎందుకమ్మా, ప్రేమించేమనసు, ప్రేమే దైవం, ప్రేమేనాప్రాణం, ప్రేయసి రావే, ప్రేమ చరిత్ర……………..లాంటి సినిమాలు వేరైనా కథ ఒక్కటే.

(నీరసంగా…) ఉపోద్ఘాతంలోనే ఊరంతా తిప్పించావు, అసలు కథ ఎప్పుడు చెబుతావు నాయనా!!
మధ్యలో పుల్లలెయ్యకుండా చెప్పేది విను ముందు…

చెప్పు…అడిగాక తప్పుతుందా.

ఈ పరుగు సినిమా కూడా అదే ప్రేమ కధే, కాకుంటే ఇది ఓ తండ్రి కోణం లో నుంచి చూపిన కథ. సాధారణంగా ప్రేమ కథల్లో మొదట హీరో హీరోయిన్ల పరిచయం, పరిచయం ప్రేమగా మారటం, ఆ ప్రేమను పెద్దలు అంగీకరించకపోవటం లేదా పరిస్థితులు అనుకూలించకపోవటం, దాంతో హీరోయిజాన్ని ప్రదర్శిస్తూ కథానాయకుడు కథానాయికను స్నేహితుల సాయంతో లేపుకెళ్ళిపోవడం చూపుతారు (జయం సినిమా గుర్తుందా?). లేచిపోయిన జంట మీద సానుభూతి సంపాదించడానికి కథానాయికను పెళ్ళీ చేసుకోబోయే పెళ్ళికొడుకు మహాక్రూరుడో, దుర్గుణ సంపన్నుడిగానో చూపుతారు. కానీ నిజ జీవితంలో ఇలాంటి విలన్లు
అరుదు. రుక్మిణీ కళ్యాణం సినిమాల నాటి నుంచి ఇలాంటి సన్నివేశాలను చూసి చూసి ప్రేక్షకులకు….. లేచ్‌పోవటం మరీ అంత బ్యాడేమీ కాదు, పెద్దలు పెళ్ళికి ఒప్పుకోకపోతే పాపం పసి ప్రేమికులు ఏమి చేస్తారు మరి, ప్రేమను గెలుచుకోవటం ప్రేమికుల కర్తవ్యం, ప్రేమే జీవితం లాంటి భావాలు ప్రేక్షకుల స్మృతిలో నిలచిపోయాయి. నిజ జీవితంలో సినిమా జనాలతో సహా చాలా మందికి స్పూర్థిని ఇచ్చాయి కూడా. నాగార్జున నటించిన ‘సంతోషం’లాంటి కొన్ని సినిమాలు మాత్రం ఒక జంట లేచిపోవటం ఆ జంట సమస్య కాదని, అది రెండు కుటుంబాల గౌరవం సమస్యని సున్నితంగా చూపాయి.

(చప్పట్లు కొడుతూ) శభాష్…నువ్వొద్దని పుల్లెయ్యకుండా ఉండలేకపోతున్నా… నీ ఉపన్యాసం బాగుంది కానీ, అసలు పరుగు సినిమా కథ చెప్పవయ్యా బాబూ.
చూడు మిష్టర్…ఐ విల్ సీ మూవీ విథ్ డైరెక్టర్స్ పాయింట్ ఆఫ్ వ్యూ అండ్ వాట్ మెస్సేజ్ హీ ఈస్ కన్వేయింగ్. సో ఎక్స్‌ప్లైనింగ్ ఆల్ దీస్ అబ్జర్వేషన్స్ ఆర్ నెసెస్సరీ బిఫోర్ ఐ టెల్ యూ ద వొరిజిన పరుగు స్టోరీ…వోఖే? వైదివే యూకెన్ హ్యావ్ దిస్ కూల్ డ్రింక్స్ మీన్ వైల్ యూ లిజన్ టు మై లెక్చర్.

నీ అబ్జర్వేషన్స్ మడిచి…టపా చివర్లో పెట్టుకో. ఇప్పుడు కథ చెప్పు.
వోఖే…యాజ్ యూ లైక్.

ధ్యాంక్స్….కథ మొదలు పెట్టబోతున్నందుకు మరియి కూల్ డ్రింక్స్ ఆఫర్ చేసునందుకూనూ…
అనగనగా ఓ పల్లె‌లో ఓ ప్రకాష్‌రాజ్. ప్రకాష్‌రాజ్ అంటే సన్నా బన్నా మనిషా…ఆ ఊరికే పెదరాయుడన్న మాట. భార్య అందమైన ఇద్దరు కూతుర్లుని ఇచ్చి చనిపోయింది. పెద్ద కూతురు పెళ్ళి సీనే సినిమాలో మొదటి సీనన్న మాట. లైట్లు, తోరణాలతో అలంకరింపబడిన పెళ్ళి ఇళ్ళంతా జోకులేసుకుంటున్న స్నేహితులతో, ఎర్పాట్లు చూస్తున్న బంధువులతో హడావుడిగా ఉంటుంది. ప్రకాష్‌రాజ్ పెద్ద కూతురు, ఇప్పుడు పెళ్ళి కూతురు ఐన పూనమ్ బాజ్వా గౌరీ పూజ చేసి చీర మార్చుకోవడానికని వెళ్ళి అట్నుంచి అటే ఓ పేద హ్యాండ్సమ్ గైతో పరారయిపోతుంది. ఈ వార్త విని హతాశ్యుడైన తండ్రి హడావుడిగా రైల్వేస్టేషన్లను గాలించినా లాభముండదు. అప్పటికే ప్రేమికుల జంట జంప్‌ అన్న మాట. ఆ జంపైపోయింది కూడా అదే ఊరికి చెందిన బాబూ అన్న కుర్రాడితో అని తెలుస్తుంది. ఆ జంటెక్కడుందో కనుక్కోవడానికి బాబు స్నేహితుల్నంతా తన్ని తీసుకొస్తారు. ఆ జంటెక్కడ ఉందో చెప్పమని ఓ స్టోర్రూములో బంధిస్తారు. ఆ బంధింపబడిన వారిలో ఒకడు మన హీరో(?) అల్లూ అర్జున్. మరుసటి రోజు తెల్లవారే స్నేహితులంతా పారిపోవాలని చూస్తారు. ఆ పారిపోయే మార్గంలో మన అల్లూకి ప్రకాస్‌రాజ్ రెండో కూతురు షీలా పొగమంచులో నడుకొంటూ, చలికి వణుకుతూ శాలువాతో యువరాణిలా కనిపిస్తుంది. అంతే..అప్పటి దాకా ఒకటే పరిగెత్తిన హీరో కాళ్ళకు బ్రేక్స్. మళ్ళా తనను బంధించిన చోటుకు వచ్చేసి, తన యువరాణి సాక్షాత్కారం పొందేంత వరకూ అక్కడ నుండి కదలకూడదనుకుంటాడు. కొన్ని అనుకోని పరిస్థితుల మూలంగా పూనం బాజ్వా – బాబు జంట వ్రాసుకున్న ఉత్తరాలు అర్జున్ చేతిలో పడతాయి. అందులో షీలాకు సంబంధించిన సమాచారం ఉండటంతో, తనను అనుమానించి అక్క లేచిపోవాటానికి సహాయం చేసింది తనే అనుకుంటారని షీలా భయపడుతుంది. అర్జున్ దగ్గరున్న ఆ ఉత్తరాలు ఆమె తిరిగి లాక్కోవటం ఓ ప్రసహనం. ఈ క్రమంలో పెద్ద కూతురు లేచిపోవటానికి సహాయం చేసింది మన అల్లూ అర్జున్ అని ప్రకాస్‌రాజ్‌కి తెలిసిపోతుంది. అక్కడి నుంచి ‘నా కూతురెక్కడ ఉందిరా చెప్పరా బాబూ’ అని ప్రకాష్‌రాజ్ అర్జున్‌ను బ్రతిమాలుకోవటం, ‘వాళ్ళేదో లేచిపోయి ఆనందంగా ఉంటే మధ్యలో నీ గోలేంటి’
అని అర్జున్. చేసింది చాలక చిన్న కూతురుని కూడా ప్రేమించేటట్టు చేసి, ఆమెను కూడా లేపుకెళ్ళిపోయే ప్రయత్నం. అసలు తండ్రి లేచిపోయిన కూతురు జాడ తెలుసుకున్నాడా? పెద్ద కూతురు పరిస్థితి ఏంటి? షీలా అర్జుజ్‌ను ప్రేమించిందా? వారి ప్రేమను ఆమె తండ్రి ఆమోదించాడా? లేక వాళ్ళు లేచిపోయారా? అర్జున్ తన తప్పు తెలుసుకున్నాడా అన్నది మిగిలిన కథ.

భేతాళ కథలో లాగా చివర్లో ఆ ప్రశ్నలేంటి? ఆ క్లయిమాక్సు ఏదో కాస్త చెప్పరా బాబూ.

కథలో ఎస్సెన్సు మరియు సస్పెన్సు కూడా చెప్పిన్నట్లౌతుందని సందేహించా…సరే నీకోసం క్లుప్తంగా చెప్తా. ప్రకాష్‌రాజ్ పెద్దకూతురుని హైదరాబాదులో కలుసుకుంటాడు, కూతురేమో ప్రియుడి చెయ్యి పట్టుకొని “నా దారి నేను చూసుకున్న తరువాత కూడా నన్ను కుక్కలా వెంబడిస్తావేం” అని కసురుకుంటుంది. మనసు విరిగి పల్లెకు తిరిగి వచ్చేస్తాడు తండ్రి. కనీసం చిన్న కూతురు కైనా పెళ్ళి చేసి ముచ్చట తీర్చుకుందాం అని అనుకుంటాడు. ఇంతలో హీరో హీరోయిన్ను ప్రేమించుకుంటున్నారని తెలిసి ట్రూ రిపెంటెన్సు కలగడం చేత … తూచ్ ఈ పెళ్ళి క్యాన్సిల్ అనేసి…అర్జున్ చేతిలో చిన్న కూతురి చెయ్యి పెట్టేస్తాడు.

ఒక్క నిముషం…చాలా సందేహాలు పుట్టుకొచ్చాయి నాకు. ఈ కథలో తప్పెవ్వరు చేశారు? ఎవరు తప్పు దిద్దుకున్నారు? అసలు కథ చెప్పదలుచుకున్నదేమిటి? లేచిపోవడం తప్పనా లేక బిడ్డలు ఎప్పుడు లేచిపోతారో కనుక్కొని దానికి ముందే వారికి పెళ్ళి చేసెయ్యాలనా? అంతా తిక మకగా ఉంది.
వురేయ్…కథ విన్న నీకే ఇన్ని సందేహాలొస్తే…నలభై రూపాయలు పెట్టి ధియటర్లో సినిమా చూసిన నాకు ఎన్ని సందేహాలు వచ్చుండాలి

సందేహాలది ఏముంది కానీ … ఈ విషయంలో నీ అభిప్రాయమిటో చెప్పు?

లేచిపోవటం గురించి లెక్చరిచ్చేంత లెవల్లో నేను లేను కానీ…ఇంకో మాటడుగు.

సినిమాలో ఇంకేమి నచ్చాయి నీకు?
1) ముందే చెప్పినట్లు రొడ్దకొట్టుడు మాఫియానో ఫ్యాక్షన్ కథ కాక, భావావేశాలకు అవకాశం ఉన్న కథ
2) రెండు పాటలు చిత్రీకరణ బాగుంది
3) కూతురు లేచిపోయిందన్న బాధతో ప్రకాష్‌రాజ్ చిత్తుగా తాగేసి, అల్లు అర్జున్‌తో తన కూతుర్ని ఎంతగా ప్రేమిస్తున్నాడో చెప్పే సన్నివేశం అధ్బుతం. ఇలాంటి సన్నివేశాలు ఇంకో రెండు మూడు ఉన్నా సినిమా ఇంకా బలంగా నిలబడేది.
4) “ఉద్యోగం లేకుండా, జేబులో రెండు వేలు కూడా లేకుండా పారిపోయి కాపురం ఎలా పెడతార్రా” అని ప్రకాష్ రాజ్ అర్జున్‌ను నిలవదీసే సన్నివేశం బాగుంది
5) ఆర్య సమాజంలో అల్లు అర్జున్,ఆలి, ప్రకాష్‌రాజ్ ల మధ్య నడిచే సన్నివేశం చిరంజీవి కూతురు-శిరీష్‌లను గుర్తు తెస్తుంది
6) ఓ సి-గ్రేడ్ చెత్త లాడ్జిలో కూతురు పదైదు రోజులు తన ప్రియుడితో ఉందని తెలిసిన సన్నివేశంలో ప్రకాష్‌రాజ్ నటన

సినిమాలో నచ్చనిదేమిటి?
1) సినిమా మొదటి నుంచే అల్లూ అర్జున్ విలన్ లాగా, ప్రకాష్‌రాజ్ కథానాయకుడిగా అనిపించాడు. ప్రేమ జంటని లేచిపొమ్మని ప్రోత్సాహం ఇవ్వడం సహాయం చెయ్యడం తప్పితే వేరే పని ఏదీ లేనట్టుంది హీరోగారికి.
2) షీలా అల్లూ అర్జున్‌ను హఠాత్తుగా ఎందుకు ప్రేమించడం మొదలుపెట్టిందో ప్రేక్షకుడికి అర్థం కాదు.
3) కొన్ని పాటలు సందర్భం లేకుండా ఇరికించినట్లు అనిపించింది
4) క్లైమాక్స్ నాకైతే ఏమర్థం కాలేదు. పిల్లలు లేచిపోతే బాధ పడే పెద్దల కథో లేక ప్రేమించినవాళ్ళని పెద్దవాళ్ళు ఆదరించాలి అనే కధో స్పష్టం కాకుండా పోయింది. ఇది భాస్కర్ చేసిన అతిపెద్ద తప్పిదం.
5) ఈ మధ్య సినిమాలలో కథ తక్కువ కథనం ఎక్కువ అయ్యింది. ఇలా సినిమాలు తీయటం ఎంత రిస్కో మొన్న ‘కొండవీటి దొంగ’ సినిమా చూస్తే అర్థం అయ్యింది. ఈ సినిమాలో కథ ఒక్క నిముషం కూడా ఆగక చక చక పరుగులు తీస్తూ ప్రేక్షకులను ఆలరిస్తుంది. నవతరం దర్శకులు కొత్త సినిమా తీసే ముందు ఇలాంటి పాత సినిమాలు ఇంకో సారి చూస్తే మంచిది

ఇంకేంటి విశేషాలు?
1) మొదటి సినిమాతో సూపర్‌హిట్టు కొట్టిన దర్శకుల రెండో సినిమా ఫట్ అనే నానుడికి భాస్కర్ మరింత బలం చేకూర్చాడు. కాకుంటే రాజమౌళీ ఇందుకు అతీతుడు.
2) ఈ సినిమాతో తన కెరీర్‌ గాడిలో పడుతుందన్న షీలా ఆసలు అడియాసలయ్యాయి
3) అల్లూ అర్జున్ చాలా బాగా నటించాడు, అవార్డు వస్తుంది అనే వాళ్ళు, పాత చిరంజీవి సినిమాలు చూసి అసలు నటన అనగా ఏమి అని తెలుసుకోవచ్చు.
4) నిర్మాత ‘దిల్’రాజుకు మున్నా తరువాత ఇంకో నిరాశాజనక ఫలితం
5) ఓ పాటలో అర్జున్ డ్యాన్సులను ఇరగదీశాడు
ఇంకేనా గుర్తొస్తే చెబుతాలే

హమ్మయ్య…మొత్తానికి ఒక సినిమా గురించి చెప్పావు…బొబ్రచసి గురించి చెప్పు..
ఇప్పటికే ఎక్కువైంది. దాని గురించి రేపు చెబుతాలే… ఒక్క విషయం మాత్రం చెప్పగలను. ఆ సినిమాను ధర్మవరపు సుబ్రమణ్యం కోసం చూడాలి. కృష్ణ భగవాన్, కోవై సరళా, జయప్రకాష్ రెడ్డి, ధర్మవరపు సుబ్రమణ్యం లాంటి హాస్య చక్రవర్తులు కొన్ని సన్ని వేశాల్లో ఇరగదీశారు. పిల్లలతో వెళ్ళడం మంచిది కాదు.
(సశేషం)


ఇలాంటివే మరిన్ని సినిమా విశేషాలు:

1) ‘జల్సా’ సినిమా సమీక్ష
2) వామ్మో… ఆపదమొక్కులవాడు
3) అనసూయ నాకు ఎందుకు నచ్చిందంటే…..

‘జల్సా’ సినిమా సమీక్ష

విజ్యువల్ యెఫెక్ట్స్ ఆస్కార్ గెలుచుకొన్న ‘లార్డ్ ఆఫ్ ద రింగ్స్‘ నిర్మించడానికి కేవలం సంవత్సరం పట్టిందంట. మరి మన పెద్ద హీరోలకు తొడకొట్టే మామూలు సినిమాలు పూర్తి చెయ్యటానికి కూడా ఎందుకు అంత సమయం పడుతుందో మన దర్శకులకు ఎరుక. ఆనాటి నిప్పురవ్వ నుండి ఈనాటి సైనికుడు, జల్సా వరకు ఇదే తంతు. తమ హీరో సినిమా ఆలస్యమైయ్యే కొద్దీ అభిమానల్లో ఆసక్తి విపరీతంగా పెరిగిపోవడం, దానికి తగ్గట్టే మార్కెటింగ్ మేనేజర్ లాంటి నిర్మాత లేని హైప్ సినిమాకు తెప్పించడం, మంచి రేటుకు సినిమాను అమ్ముకున్న తరువాత వందల కొద్దీ థియేటర్లలో విడుదల చెయ్యటం మామూలయిపోయింది. ఈ ‘వందలు’ సంఖ్య నిర్ణయించడానికి రెండు ప్రాతిపదికలు ఉన్నాయి. ఇంతకు ముందు ఎగస్పార్టీ హీరో సినిమాల కన్నా ఎక్కువ థియేటర్లు ఉండాలి, జనాలు ఇది బోకు సినిమా అని తెలుసుకునే లోపే మన పెట్టుబడి మనకు తిరిగి వచ్చెయ్యాలి. ఇందులో భాగమే మొదటి రెండు వారాలు ఇష్టమొచ్చిన రేటుకు టిక్కెట్టును అమ్ముకునే అధికారం, అవకాశం థియేటర్లకు కట్టబెట్టడం. వీటన్నిటి పైనా మొదటి ఆట టిక్కెట్ల వేలం, రాజకీయ నాయకుల గాలం వగైరా వగైరా. రెండు సంవత్సరాలు కాసుకొని, విడుదల రోజున ధియేటరు గేట్ల దగ్గర తోసుకొని, వందలు విదిలించి ‘వదిలించు”కొని’ సంపాదించిన టిక్కెట్టుతో విజయ గర్వంతో ధియేటర్లోకి అడుగుపెడతాడు సగటు అభిమాని. భీభత్సమైన వెరైటీగా సినిమా టైటిల్స్ పడేటప్పుడు ….అభిమానుల గోల,ఈలలు సినిమా మొదలైన తరువాత తగ్గుతాయి. ధియేటర్లోకి వెళ్ళేటప్పుడు, నైలు నదిని దాటే జీబ్రాల్లా చెంగు చెంగున గెంతుకుంటూ వెళ్ళిన అభిమాని, తిరిగి వచ్చేటప్పుడు నాలుగు లంకణాలు చేసి…నెత్తి మీద సమ్మెటతో పదిసార్లు కొట్టిచ్చుకున్న బాపతులా ఉంటాడు.

ఉరేయ్…సినిమా ఎట్లుంది రా అని అడిగితే …వాళ్ళిచ్చే కొన్ని జవాబులు చూడండి:

  1. ధియేటర్ ఫుల్లు రష్షు రా, డైలాగులేమీ ఇనపడలా
  2. సెకండాప్ బాగుంది రా
  3. మూడు డ్యాన్సులు బాగున్నాయ్ రా
  4. ఫరవాలేదు…ఒక్క సారి చూడచ్చు
  5. ఊర్లో సినిమాలు చూసేకి ఇంకేమీ మిగలకపోతే, దీన్ని చూడొచ్చు.
  6. ఏమీ ఎక్స్పెక్టేషన్సు పెట్టుకోకుండా చూస్తే…బాగుంటాది రా. లేకుంటే ల్యా.

ఏమీ సరుకులేని సినిమాల్లో కూడా ఇలా ఏదో ఒక మంచిని చూస్తూ, హీరోలను ప్రోత్సహిస్తున్న తెలుగు అభిమానులు చాలా గొప్పవాళ్ళు. మరి ఆ అభిమానాన్ని నిలబెట్టుకునే సత్తా మన హీరోలకు ఉందా?

ఇప్పుడు అసలు విషయం జల్సా సినిమాకు వద్దాం.

ఆర్థిక, సామాజిక, ఆరోగ్య కారాణాల రీత్యా సంజయ్ సాహు అనబడే పవన్ కళ్యాణ్ కుటుంబాన్నంతా పోగట్టుకుంటాడు. దీంతో గుండెల్లో భూస్వాముల పట్ల అణిగి ఉండే కోపం బయటకు తన్నుకొచ్చి నక్సలైట్లలో చేరుతాడు. కొరియర్ స్థాయి నుండి లీడర్ స్థాయికి ఎదిగిన పవన్, ప్రకాష్‌రాజ్ అనబడే ఓ పోలీస్ ఆఫీసర్ చేసిన దారుణ ఎన్కౌంటర్లో తోటి నక్సలైట్లనంతా పోగట్టుకుంటాడు. తరువాత లొంగిపోయి జన జీవన స్రవంతిలో కలిసిపోతాడు. కమలినీ ముఖర్జీ అనబడే ప్రకాష్‌రాజ్ కూతురు, మన పవన కళ్యాణ్‌ను ప్ర్రేమిస్తుంది. కానీ మన పోలీస్ ప్రకాష్‌రాజ్ ఇడియట్ సినిమా తరువాత కూడా మారకపోవడంతో పెళ్ళికి ఒప్పుకోడు. ఇట్సాల్రైట్ అని..సింపుల్‌గా తండ్రి చెప్పిన వాడినే పెళ్ళి చేసుకొంటుంది. దాని తరువాత మన పవనేమో..పగలు కాలేజీలో చదువు, రాత్రి బారులో మందు కొట్టడంలో బిజీగా ఉంటాడు. ఇప్పుడు అసలు వీరోఇన్ల ఇంట్రడక్షన్. హీరోఇన్లంటే ఎవరో కాదు, మన ఇలియానా, పార్వతీ మెల్టన్లే.
ఇప్పుడు మీకో చిన్న జీ.కే ప్రశ్న
1)సాధారణంగా కమర్షియల్ సినిమాల్లో హీరోఇన్లను ఇట్రడ్యూస్ చెయ్యటానికి అనువు గల సీను ఏది?
a)బీచిలోనో/స్విమ్మింగు పూల్లోనో పొట్టిబట్టలతో తడుస్తూ వయ్యారంగా బయటకు రావటం
b)ట్రాక్ సూట్లతో ఏ జిమ్ములోనో అందాలను విరజిమ్మటము లేదా స్లో మోషన్లో టెన్నీసు ఆడటము
c)ఏ గూండా కంట్లోనో పడి రేప్‌కు గురికావటము (ఇది పాత పద్దతి. గూండా వికటాట్టహాసం మాని ముట్టుకునే లోపే ఠంచనుగా హీరో వచ్చేస్తాడులెండి)
d)ఇంకో క్రియేటివ్ పద్దతి
సాధారణంగా తెలుగు దర్శకులు మొదటి మూడు పద్దతులను ఎంచుకుంటారు. ఎప్పుడూ లేనిది, మన త్రివిక్రముడు రెండు, మూడు పద్దతులను కలిపి ఎంచుకున్నాడు. రెండోది మూడో దానికి కారణమౌతుందన్నమాట. షరా మామూలుగా…గూండాలు రేప్ చెయ్యబోతే ఇలియానా, పార్వతీ ఇద్దరూ కూడా పవన్ దగ్గరకు పరిగెడతారు. పవనేమో…గుద్దుకో గూండాను పడగొడతాడు. అది చూసిన ఈ బ్యూటీలు, వీడు నా వాడే అని ఎవరికి వారు అనేసుకుంటారు. మొదట…పార్వతి ‘ఐలవ్యూ’ అని ప్రొపోజ్ చేస్తే, పవన్ ప్రవరాఖ్యుడిలా ‘ఛీ..పో..నువ్వు నాకు నచ్చలేదు’ అంటాడు. లైన్ క్లియరైపోవడంతో, పవన్‌ను పడేద్దామని ఇలియానా ఫస్టాఫంతా ప్రయత్నిస్తూంటుంది. మధ్య మధ్యలో..దామోదర్ రెడ్డి అనే ఫ్యాక్షనిస్టు పవన్‌ను చంపాలని చూస్తూంటాడు. ఇలియానాకు ప్రేమ వరం ఇచ్చాడా, దామోదర్‌రెడ్డి ఎందుకు చంపాలనుకున్నాడు? అతని హత్యా ప్రయత్నాలను హీరో తిప్పికొట్టగలిగాడా అన్నదే మిగతా కథ.

నచ్చినవి:

  1. పవన్ నటన చాలా బాగుంది. చాలా హుషారుగా నటించాడు. బావోద్వేగాలు కూడా చాలా బాగా చూపించాడు.
  2. సినిమాటోగ్రఫీ అదరహో. ముఖ్యంగా పోరాట దృశ్యాల్లో.
  3. హీరోయిన్లను పాటల్లో కానీ, సీన్లలో కానీ ఎక్కడా అసభ్యంగా చూపకపోవడం. పవన్ కళ్యాన్ ఇందుకు ప్రత్యేకంగా అభినందనీయుడు. ఇతని సినిమాల్లో ఆడవారిని అసభ్యంగా చూపరు.
  4. మాటలు కొన్ని బాగా నచ్చాయి. ఉదా:
  • బడికి నాలుగు కి.మి దూరంగా, ప్రభుత్వాస్పత్రికి ఎనిమిది కి.మీ దూరంగా, దురదృష్టానికి దగ్గరగా బ్రతుకుతున్నారు
  • పంటను పురుగు ఆశించింది. పురుగుల మందు చల్లాడు, పని చెయ్యలేదు. పురుగుల మందు తను తాగాడు, ఈ సారి పని చేసింది.
  • ఆకలైనా తినకుండా ఉంటే అది ఉపవాసం, నిద్రొచ్చినా పడుకోకుండా ఉంటే అది జాగరణ, చంపే అవకాశం వచ్చినా వదిలేస్తే అది మానవత్వం
  • రవి పార్కులాంటోడు. ఒక వారం చూస్తే, మరి కొత్తగా చూడటానికేమీ ఉండదు. సంజయ్ అలా కాదు, జీవితంలో ప్రతి రోజూ ఏదో కొత్తదనం చూపిస్తాడు.
  • నేనూ ఈ మధ్యే మార్గదర్శిలో చేరాను, ఒక తుపాకీ కొన్నాను

నచ్చనివి:

  1. అసలు నేను ఇక్కడ కథను సాధ్యమైనంత లీనియర్‌గా చెప్పాను. సినిమాల్లో కథంతా కలగాపులగంగా ఉంది.
  2. త్రివిక్రముడికి మాటల రచయితగా మాత్రమే మార్కులు పడతాయి. స్క్రీన్‌ప్లే లో ఘోరంగా విఫలం అయ్యాడు.
  3. గండరగండల్లాంటి హాస్యనటులు బ్రహ్మానందం, సునీల్, ఆలీ‌లను పూర్తి స్థాయిలో వినియోగించుకోలేదు
  4. ఇలియానాకు కొన్ని పాటల్లో మేకప్ విపరీతంగా ఉండి, ఎబ్బెట్టుగా ఉంది
  5. పాటలు, డ్యాన్సులు జస్ట్ ఓఖే. సూపరు..అనేంతగా ఏమీ లేదు.
  6. చాలా సీన్లు ఇల్లాజికల్‌గా, సిల్లీగా, అసంపూర్తిగా ఉన్నాయ్
  7. ఇది A సర్టిఫైడ్ సినిమా, హింస చాలా ఉంది సినిమాలో
  8. కథనంలో ట్విస్టులు ఎక్కువైయ్యాయి

అవీ-ఇవీ:

  1. ఇలియానా అంటే ఆంధ్రాలో కుర్రాళ్ళు ఎలా పడిచస్తారో, పార్వతి మెల్టన్ అంటే మళయాళీ కుర్రాళ్ళు అంతకంటే ఎక్కువ పడిచస్తూన్నారంట.
  2. మొదటి వారంలో 21కోట్లు, రెండు వారాల్లో 32కోట్లు వసూలు చేసిందని గీతా ఆర్ట్స్ ఉవాచ

చివరగా:

* ఈ ఆదివారం ఏదో సినిమాకు తప్పని సరిగా వెళ్ళాలి అంటే, ఈ సినిమాకు ఒక్క సారి వెళ్ళవచ్చు

యూట్యూబ్లో దుమ్ము రేపుతున్న చిరంజీవి వీడియోలు :)

ఓ వీడియోని 9,113,536 సార్లు చూశారు. 18291 వ్యాఖ్యానాలు వ్రాశారు. 18291 సార్లు రేటింగు ఇస్తే, సుమారుగా 4/5 రేటింగు వచ్చింది ఈ వీడియోకి. ఈ నంబర్లు మన చిరు డ్యాన్సాడిన ఓ పాట వీడియోదంటే నమ్మగలరా? చిన్నప్పుడు దొంగ సినిమాను చౌడేపల్లెలో చూశా. అప్పుడు చిరంజీవి చేసిన పోరాటాలు, నృత్యాలు విపరీతంగా నచ్చేశాయి. అందులో ‘గోలీమార్…మార్..మార్’ అనే పాట ఒకటుంది. అప్పుడది బాగా అనిపించినా, పెద్దయ్యేసరికి అది మైఖేల్ జాక్సన్ ‘థ్రిల్లర్’ కాపీ అని తెలిసింది. ఈ రోజు చిరంజీవి వీడియోల కోసం వెతుకుతూంటే, ‘Indian Thriller’ అని ఒక వీడియో…అందులో మన చిరు బొమ్మ. ఏంటో చూద్దాం అని తెరిచా, చూస్తే, మన పాట. అలాగే క్రిందన రేటింగు, వ్యూస్, కామెంట్లు చూసేసరికి కళ్ళు తిరిగాయి. ఒక తెలుగు వీడియోకి పద్దెనిమిది వేల వ్యాఖ్యలా……………………….వామ్మో. ఖచితంగా 80% విదేశీయులవే అయ్యుంటాయి.

వ్యాఖ్యల్లో మాత్రం పాటను యేకేశారు..చండాలమైన కాపీ, భయంకరం అంటూ ఇష్టమొచ్చినట్టూ కామెంటేశారు. మచ్చుకు కొన్ని కామెంట్లు చూడండి:

  1. That’s the funniest thing I’ve ever seen
  2. this is not even close to MJ’s work….and thrller is supposed to be scary you guys are making it look lame…
  3. thanks god i am not indian
  4. hahaha!!…why the woman scare??? the woman must laugh becuase the dance steps are very ridiculous and funny,, but i really enjoy the video..

పైన వ్రాశిన కామెంట్ల కంటే క్రిందన చూపించిన జాలి భయంకరంగా ఉంది:

  • I still think this whole music video is some kind of joke about western music. Cause, honestly? Who makes something this bad on purpose?

పాటను తిట్టారు కానీ, చిరు డ్యాన్సు చాలా మందికే నచ్చినట్టుంది:

  • I love how the pounding synth music starts and he begins the shoulder action. It’s so awesome. goli ma ma. i like it when he’s humping the air.. at 2:19

ఒకతనికి ఇది ఎంతగా నచ్చిందంటే…తన భాష కాకపోయినా సాహిత్యాన్ని వ్రాయడానికి ప్రయత్నించాడు:
Goli maaaaaaar… goli maar!
Goli mar-mar-mar-mar-mar-mar-(mar).
Goli mar-mar-mar-mar-mar-(mar)…..
Kashno rau kaugileste yenche staavooo…
Ne pali manta meste yee maltovooo…..
Kandaru padda kane shungaa.. raamaaaa…
Valkunga guda yesta vaya raamaaa…
Goli maar!
Goli.. mar-mar-mar-mar-(mar)….
Rrrrrgrrryyaaaaayaaaaa!

చూసిన చాలా మందికి, ఇంత సిల్లీ వీడియోకి ఇన్ని హిట్లు, వ్యాఖ్యలు ఎందుకో అర్థం కాక అయోమయానికి గురయ్యారు:

  • i cant help but wonder ..why so many views?! i have lost brain cells…ahahaha

ఇక్కడా తమిళ వాసనే :(

  • this is in tamil not hindi

వ్యాఖ్య వ్రాసిన జనాల్లో సగం మంది, కేరళ భామ రాధ అందానికి ఫ్లాటయిపోయారు. ఈ విషయంలో మాత్రం అందరిదీ ఏకాభిప్రాయం :)

  • HEY INDIAN MICHAEL JACKSON! You’re girlfriend is a bumblebee…

ఇంకోడు పాటలు వ్రాయడంతో సరిపెట్టుకోకుండా ఏకంగా, పాటను ఆంగ్లంలో అనువదించే ప్రయత్నం చేశాడు :) దీనికి ఇరవై లక్షల పైన హిట్లు…పది లక్షల తిట్లు ;)


——————–
నా నార్వే స్నేహితుడు ఓ మాటన్నాడు. ఎందుకు మీ పాటల్లో విదేశీ ట్యూన్లు కాపీ కొడతరు, అనుకరించడానికి ప్రయత్నిస్తారు, మీకంటూ సొంత సంగీతం, శైలి లేదా అని. మీకంటూ సొంతంగా కళను ప్రదర్శించకపోతే ప్రపంచం మీ వైపు తిరిగి కూడా చూడదు అని.

గమ్యం సినిమా బాగుందంట

శుక్రవారం ఐపోతోంది…వారాంతం దగ్గర పడుతోంది. అవును, వారాంతంలో సగటు తెలుగుజీవి ఏమి చేస్తాడు? ఏమి చేస్తాడు…ఎన్ని సార్లు డోక్కున్నా, ఎన్ని సార్లు తల బొప్పికట్టిచ్చుకున్నా, ఎన్ని సార్లు థూ..ఇది ఒక సినిమానే!! అని తిట్టుకున్నా ఆశాజీవైన తెలుగోడు మళ్ళీ మళ్ళీ థియేటర్ వైపుకే అడుగులేస్తాడు. ఏం చేస్తాం ఉన్న చెత్త సినిమాల్లో ఓ ఉత్త(మ) చెత్త సినిమాను ఎంచుకొని వెళ్ళవలసిన పరిస్థితాయె. సరే అషలు విషయానికొచ్చేస్తున్నా. ఇటీవలే విడుదలైన గమ్యం సినిమా చాలా బాగుందని విశ్వసనీయ మరియు అవిశ్వసనీయ వర్గాల ద్వారా కూడా తెలియవచ్చింది. ఆన్ని రివ్యూలు, చూసిన జనాలందరూ దీన్ని మంచి సినిమా, చూడవలసిన సినిమా అని కితాబులు బిరుదులు ఇచ్చేస్తున్నారు. కాబట్టి మీ ఊర్లో ఈ సినిమా ఆడుతూంటే ఈ వారాంతం ‘గమ్యం’ వైపు హ్యాపీగా అడుగులు వెయ్యవచ్చు.
తెలుగు సినిమా చూడనని ఒట్టుపెట్టుకున్న వాళ్ళుమాత్రం నిన్న విడుదలైన 10000BC సినిమా చూసే ప్రోగ్రాము పెట్టుకోవచ్చు. సినిమా ఎలా ఉన్నా, ఎప్పుడో అంతరించిపోయిన శాబర్ కోరల పులులు, మమ్మోతులు చూడటం కోసమైనా వెళ్ళాల్సిందే (ఇప్పుడే అందిన వార్త, సినిమా పరమ చెత్తగా ఉందంట. గ్రాఫిక్సు చూడాటానికి మాత్రమే వెళ్ళచ్చంట). ఇవి రెండూ కాక కొత్త ఇండియానా జోన్సు ఎప్పుడొస్తాడా అని రెండు కళ్లతో ఎదురుచూస్తున్నా :)

జాన్ అప్పారావ్ 40+

ఈ సినిమా The 40 year old virgin కు ఫ్రీ మేక్ ఏమో అనిపిస్తోంది. ఇక రెండు రోజులాగితే….నిజమో కాదో తెలిసిపోతుంది. పోస్టర్లు..ట్రైలరు చూసి సినిమా మీద అంచనాకొచ్చే రోజులు పోయాయి. జనాలకు పోయే కాలమొస్తే తప్ప…తెలుగు సినిమాను మొదటి రోజే చూసెయ్యలన్న దుగ్ద..దురద పుట్టదు.

ఎందుకన్నా మంచిది…ఆగి…చూసి…వెళ్ళండి. అంటే… మొదటి రోజు ఆగి…రివ్యూలు చూసి…తరువాత వెళ్ళండి అని. నా మాట కాదన్నారా…ఇదిగో..ఇటీవలే వచ్చిన ఓ ఏడు సినిమాల రివ్యూ హెడ్డింగులను ఇక్కడ ఇస్తున్నాను.

  • ‘Visakha Express’ Review: Journey with Halts and Jerks
  • ‘Sundarakanda’ Review: A Boring Narration
  • ‘Krishnarjuna’ Review: Very Dull Output
  • ‘Swagatham’ Review: Domination Of Sentiment
  • ‘Pourudu’ Review: Average With Weak Narration
  • ‘Okka Magadu’ Review: Disappointment For All
  • ‘Apadamokkulavadu’ Review: Confused Political Satire (?!)

ఇక మీ ఇష్టం.

రొడ్ద కొట్టుడు ఫార్ములా ….హీరోయిజం మీద ఆధార పడకుండా ఈ సినిమా..తెలుగు సినిమా ప్రేక్షకులకు మంచి వినోదం పంచివ్వాలని ఆశిస్తున్నాను.

వామ్మో… ఆపదమొక్కులవాడు

అలా సూత్తారేంటి…….కలియుగదైవం, ఇష్టదైవం ఐన ఆ తిరుమలేశుని గురించి కాదండి..ఈ మధ్యే ఆంధ్రప్రదేశ్ ధియేటర్లలోకి వ్యాపించిన ‘ఆపదమొక్కులవాడు’ అనే సినిమా చీడ గురించి నేను చెప్పేది. దీన్ని పోసాని అనే రచయిత డవిరెక్టు చేశాడులెండి..హీరో మన చిరు తమ్ముడు నాగబాబు హీరో. పాపం నాగబాబు ఖర్మేందో కానీ…..అంక చండాల, నీచ, నికృష్ట, దరిద్ర, బేవార్స సినిమాలకంతా హీరోగా కుదురుకుంటాడు. పదైదేళ్ళ ముందనుకుంటా ఈయన కథానాయకుడిగా నటించిన ‘దాదర్ ఎక్స్‌ప్రెస్’ అనే సినిమా చూసి జ్వరమొచ్చింది. ఓ సినిమా కూడా ఇంతలా విరక్తి కలిగించగలదా అని అనిపించిన సినిమా. అప్పుడు బెంగళూరులో ఏదో శుభకార్యానికి హాజరు కావటానికి మా అత్తమ్మవాళ్ళింటికి వచ్చాము. పొద్దున్నంతా పెళ్ళి సందడి బోరుకొట్టడంతో సాయంకాలం రానని మొండికేశాను. సరే అని ఇంట్లో నన్ను ఒక్కణ్ణే ఉంచి మిగిలిన జనాలంతా ఫంక్షన్‌కు వెళ్ళారు. వెళ్ళిన వాళ్ళు వెళ్ళినట్టు ఉండక ఈ ‘దాదర్ ఎక్స్‌ప్రెస్’ సినిమా క్యాసెట్టు వీసీయార్‌లో పడేసి చూస్తూండమని చెప్పి వెళ్ళారు. అంతే … వామ్మో ….అదేమి సినిమారా నాయనా. చూస్తూ చూస్తూ అల్లాగే సోఫాలోకి ఒరిగిపోయాను. అమ్మావాళ్ళు వచ్చేటప్పటికి జ్వరమొచ్చేసింది. నా జీవితంలో ఆ సినిమా ఓ పీడకల.

ఇక చరిత్ర అనుకున్న పీడకల రీటెలికాస్టెడ్ సీరియల్లా మళ్ళీ ‘ఆపదమొక్కులవాడు’ పేరుతో మన ముందుకు వచ్చేసినట్టుంది. ఈ సినిమా చూసిన కొందరు ఏమి చెబుతున్నారో చదవండి:
ఈ సినిమాకు వెళ్ళాలి అనుకుంటే అమృతాంజనం తీసుకు వెళ్ళండి. తట్టుకోలేని భయంకరమైన సుత్తి సినిమా. ఏదో దా’సిరి’ …చిరంజీవి అంటూంటే ఏదో చిరంజీవి గురించి చూపి ఉంటాడు కదా అని వచ్చాము. చూస్తే చిరంజీవి లేదు గాడిద ఎగ్గూ లేదు” అని పూడుకుపోయిన గద్గద స్వరంతో ఆవేదన వెలుబుచ్చిన ఓ అన్న

అమృతాంజన్ ఏమి సరిపోతాదండి…ఈ సినిమాని మరచిపోవాలంటే రెండు పెగ్గులు పడాల్సిందే లేకుంటే ఈ సుత్తిని మరచిపోవడం కష్టం” అని కన్నీళ్ళతో తన అభిప్రాయాన్ని పంచుకున్న ఓ తమ్ముడు

అసలు పోసాని సినిమాలకు దర్శకత్వం వహించకూడదు అని ఒక చట్టం చెయ్యాలండి” ఓ చెల్లెలి సలహా

పోసాని నాకు పదేళ్ళగా తెలుసు…మొదట్లో బాగానే ఉండేవాడు. ఇలా శాడిస్టుగా ఎలా తయారయ్యాడో తెలియటం లేదు” సినిమా చూసి ఆశ్చర్యం వ్యక్తం చేసిన ఓ సినీ ప్రముఖుడు

సినిమా చూసి ‘నేనే ఆపదమొక్కులవాణ్ణి.. న్యాయం నేనే..ధర్మం నాదే’ అని పిచ్చి పిచ్చిగా మాట్లాడుతున్నాడు నా కొడుకు…నేనేం చేసేద్రా దోవుడో” ఓ కన్నతల్లి ఆవేదన

ప్రభుత్వం ఈ సినిమా చూసిన వాళ్లకు వంద ..చూసి ఆస్పత్రిలో చేరిన వాళ్ళకు వెయ్యి రూపాయలు ఎక్స్‌గ్రేషియా ప్రకటించాలి” అని ఆక్రోశించిన బాణం పార్టీ అభ్యర్థి

ప్రతి ధియేటర్‌లో ఉచితంగా వామిట్ బేసిన్‌లు అమరుస్తున్నాం…పరిస్థితి విషమించిన వాళ్ళకోసం ధియేటర్‌ నుంచి ఆపరేషన్ ధియేటర్‌కు తీసుకెళ్ళే అంబూలెన్స్‌లు సిద్దం చేసి ఉంచాం” అని ప్రకటించిన సహృదయా సేవా సంస్థ చైర్మన్

తల్లిదండ్రులు మా ప్రేమను ఒప్పుకోలేదు…..ఆత్మహత్య చేసుకోవడానికి ధైర్యం చాలకపోతే..ఇలా సినిమా చూడటానికి వచ్చాం” ఓ ప్రేమ జంట వ్యాఖ్యానం (ఆత్మహత్య చట్టరీత్యా నేరం..ఘోరం)

ఈ అభిప్రాయాలు చదివి కూడా సినిమాకు సమీక్ష రాసే దమ్మున్న ‘ఒక్క మగాడు’ ఎవరైనా ఉన్నారా?

(సినిమా నిజంగానే ఇలా ఉందని టాక్. ఈ టపా ఒక్క ప్రాణాన్ని ఐనా కాపాడగలిగితే నేను వెచ్చించిన సమయానికి అర్థం ఉన్నట్టే . కొంపదీసి నాగబాబుకి కూడా అభిమాన సంఘాలు లేవు కదా. ఉంటే చెప్పండి ఈ టపా వెంటనే డెలీట్ చేసేస్తా.)